|
Era·m cosselhatz, senhor (Bernart de Ventadorn) |
| |
Razo |
Bernartz de Ventador si ama una domna gentil e bella, e si la servi tant e la honret q'ella fetz so q'el volc, en dics et en faichs. E duret longa sason lor jois en leiautat et en plasers. Mas puois cambiet voluntatz a la domna, q'ella volc autr'amador; et el o saup e fo tris e dolens, e creset se partir d'ella, car mout l'era greus la compaignia de l'autre. Puois s'enpenset con hom vencuz d'amor, qe miels li era q'el agues en leis la meitat, qe del tot la perdes. Puois, cant era davan lei, lai on era l'autr'amics e l'autra gens, a lui era semblans, q'ella gardes lui plus qe tota l'autra gen; e maintas ves descresia so qe avia cresut, si con deven far tuit li fin amador, qe non deven creser so qe vesen dels oills, qe sia faillimenz a soa domna. Don Bernatz de Ventador si fez aqesta chanson qe dis: Ar m'aconseillaz, seingnor: |
|
ra·m cosselhatz, senhor, vos, c'avetz saber e sen: una domna·m der s'amor, c'ai amada lonjamen; mas eras sai de vertat qu'ilh a autr'amic privat, ni anc de nul companho companha tan greus no·m fo. |
| 'una re sui en error e·n estau en pensamen: que m'alonje ma dolor, s'eu aquest plaih li cossen. E s'aissi·l dic mon pessat, vei mo damnatge doblat. Cal que·n fassa o cal que no, re no posc far de mo pro. |
s'eu l'am a dezonor, esquerns er a tota gen; e tenran m'en li pluzor per cornut e per sofren. E s'aissi pert s'amistat, be.m tenh per dezeretat d'amor, e ja Deus no·m do mais faire vers ni chanso. |
| ois voutz sui en la folor, be serai fols, s'eu no pren d'aquestz dos mals lo menor; que mais val, mon essien, qu'eu ay' en leis la meitat que·l tot perda per foldat, car anc a nul drut felo d'amor no vi far son pro. |
ois vol autre amador ma domn', eu no lo·lh defen; e lais m'en mais per paor que per autre chauzimen; e s'anc om dec aver grat de nul servizi forsat, be dei aver guizerdo eu, que tan gran tort perdo. |
| i seu behl olh träidor, que m'esgardavon tan gen, s'atressi gardon alhor, mout i fan gran falhimen; mas d'aitan m'an mout onrat que, s'eron mil ajostat, plus gardon lai on eu so, c'a totz aicels d'eviro. |
e l'aiga que dels olhs plor, escriu salutz mais de cen, que tramer a la gensor et a la plus avinen. Manhtas vetz m'es pois membrat de so que·m fetz al comjat: qu'e·lh vi cobrir sa faisso, c'anc no·m poc dir oc ni no. |
| omna, a prezen amat autrui, e me a celat, si qu'eu n'aya tot lo pro et el la bela razo.
Garsio, ara·m chantat ma chanso, e la.m portat a mo Messager, qu'i fo, qu'e·lh quer cosselh qu'el me do. |
|
|
|
Ritorna all'indice dei Troubadours |
|
|
Ritorna all'indice di A l'entrada del tens clar |
|
|
Ritorna alla Home |
|
|
Vai al sitemap java |
|
|
Visita il settore Narrativa |
|
|
This page was created by Duca Lucifero, © 1999-2005
The gothiquesque set is made by Moyra.
The initcap has derived from the freeware ttf Music Hall. |
|
Visitors:
Accessi globali all'intero web dal 5 dicembre 1996
|
Spazio Web offerto da:
|