Bernart de Ventadorn: En cossirer et en esmai

En cossirer et en esmai
(Bernart de Ventadorn)

n cossirer et en esmai
sui d'un'amor que·m lass'e·m te,
que tan no vau ni sai ni lai
qu'ilh ades no·m tenh'en so fre,
c'aras m'a dat cor e talen
qu'eu enqueses, si podia,
tal que, si·l reis l'enqueria,
auria faih gran ardimen.

i las, chaitius e que·m farai
ni cal cosselh penrai de me
qu'ela no sap lo mal qu'eu trai
ni eu no·lh aus clamar merce.
Fol nesci ben as pauc de sen,
qu'ela nonca t'amaria
per nom que per drudaria,
c'ans no·t laisses levar al ven.

doncs, pois atressi·m morrai,
dirai li l'afan que m'en ve
vers es c'ades lo li dirai.
No farai, a la mia fe,
si sabia c'a un tenen
en fos tot' Espanha mia!
Mais volh morir de feunia
car anc me venc en pessamen.

a per me no sabra qu'eu m'ai
ni autre no l'en dira re.
Amic no volh ad aquest plai,
ans perda Deu qui pro m'en te!
Qu'eu no·n volh cozi ni paren,
que mout m'es grans cortezia
c'amors per midons m'aucia!
Mais a leis non estara gen.

doncs, ela, cal tort m'i fai,
qu'ilh no sap per que s'esdeve
Deus devinar degra oimai
qu'eu mor per s'amor et a que
al meu nesci chaptenemen
et a la gran vilania
per que·lh lenga m'entrelia
can eu denan leis me prezen.

egus jois al meu no s'eschai,
can ma domna·m garda ni·m ve,
que·l seus bels douz semblans me vai
al cor, que m'adous' e·m reve!
E si·m durava lonjamen,
sobre sainhz li juraria
qu'el mon mais nulhs jois no sia!
Mais al partir art et encen.

ois messatger no·lh trametrai
ni a me dire no·s cove,
negu cosselh de me no sai!
Mais d'una re me conort be:
ela sap letras et enten,
et agrada·m qu'eu escria
los motz, e s'a leis plazia,
legis los al meu sauvamen.

E s'a leis autre dols no·n pren,
per Deu e per merce·lh sia
que·l bel solatz que m'avia
no·m tolha ni·l seu parlar gen.

barra

barra

Ritorna all'indice dei Troubadours

Ritorna all'indice di
A l'entrada del tens clar

Ritorna alla Home

Vai al sitemap java

Visita il settore Narrativa
barra