Owê war sint verswunden (Walther von der Vogelweide)     wê war sint verswunden  alliu mîniu jâr! Ist mîn leben mir getroumet,  oder ist ez wâr? Daz ich ie wânde daz iht wære,  was daz iht? Dar nâch hân ich geslâfen  und enweiz es niht. Nû bin ich erwachet,  und ist mir unbekant daz mir hie vor was kündic  als mîn ander hant. Liute unde lant, dar inn ich  von kinde bin erzogen, die sint mir frömde worden  reht als ob ez sî gelogen. Die mîne gespilen wâren,  die sint træge unde alt. Bereitet ist daz velt,  verhouwen ist der walt: wan daz daz wazzer fliuzet  als ez wîlent flôz, vür wâr ich wande mîn  ungelücke wurde grôz. Mich grüezet maniger trâge,  der mich bekande ê wol. Diu welt ist allenthalben  ungnâden vol. Als ich gedenke an manegen  wünneclîchen tac, die mir sint enpfallen  als in daz mer ein slac, iemêr mêre ouwê.   wê wie jæmerlîche  junge liute tuont, den nû vil riuweclîche  ir gemüete stuont! Die kunnen niuwan sorgen:  ouwê wie tuont si sô? Swar ich zer welte kêre,  dâ ist nieman frô, tanzen, singen  zergât mit sorgen gar: nie kristen man gesach  sô jæmerlîchiu jâr. Nû merkent wie den frouwen  ir gebende stât, die stolzen ritter tragent  dörpellîche wât. Uns sint unsenfte brieve  her von Rôme komen, uns ist erloubet trûren  und fröide gar benomen. Daz müet mich inneclîchen sêre  - wir lebten ie vil wol -, daz ich nû vür mîn lachen  weinen kiesen sol. Die wilden vogel  betrüebet unser klage; waz wunders ist  ob dich dâ von verzage? Waz spriche ich tumber man  durch mînen bœsen zorn? Swer dirre wünne volget,  der hât jene dort verlorn, iemer mêr ouwê. wê wie uns mit süezen  dingen ist vergeben! Ich sihe die bittern gallen  mitten in dem honege Diu welt ist ûzen schœne,  wîz, güen unde rôt, und innân swarzer varwe,  vinster sam der tôt. Swen si nû verleitet habe,  der schouwe sînen trôst: er wirt mit swacher buoze  grôzer sünde erlôst. Dar an gedenkent, ritter,  ez ist iuwer dinc. Ir tragent die liehten helme  und manegen herten rinc, dar zuo die vesten schilte  und diu gewîhten swert. Wolte got wære ich  der signünfte wert! Sô wolte ich nôtic man  verdienen rîchen solt. Joch meine ich niht die huoben  noch der hêrren golt. Ich wolte selbe krône  êweclîchen tragen, die möhte ein soldanær  mit sîme sper bejagen. Möhte ich die lieben reise  gevarn über sê. sô wolte ich denne singen wol,  und niemer mêr ouwê.

	Ritorna all'indice dei Minnesangers
	Ritorna all'indice di A l'entrada del tens clar
	Ritorna alla Home
	Vai al sitemap java
	Visita il settore Narrativa

This page was created by Duca Lucifero, © 1998-2005 The gothiquesque set is made by Moyra, The original gif of initcap is a revival design made by Adam Stein and based on Gothic characters, used by the Cheswick Press in England mid 19th Century.

Visitors: Accessi globali all'intero web dal 5 dicembre 1996

	Name: E-mail: Messaggio al Duca Lucifero