Artifex, qui condidit
Artifex, qui condidit hominem ex luto
et linivit oculos ceci sacro sputo,
salvet vestras animas, crimine soluto:
«pax vobis omnibus» ego vos saluto.
O prelati nobiles,
viri litterati,
summi regis legati,
o presbiteri beati,
genus preelectum
me omnibus abiectum
consolans despectum
virtutis vestre per effectum,
pauperie mea conteste
patet manifeste
quod eo sine veste
satis inhoneste.
Si me vult audire,
contestor me scire
viros probitatis mire.
Qui virtutes faciunt, nobiles appello,
qui autem me despiciunt avarus evello
de libro viventium, ad inferos repello,
ut ibi permaneant Plutonis in cancello.