A globo veteri cum rerum faciem traxissent superi mundique seriem prudens explicuit et texuit Natura, iam preconceperat, quod fuerat factura. |
|
|
| Que causas machine mundane suscitans, de nostra virgine iam dudum cogitans plus hanc excoluit, plus prebuit honoris, dans privilegium et pretium laboris. |
|
In hac pre ceteris totius operis Nature lucet opera. tot munera nulli favoris contulit, sed extulit hanc ultra cetera. |
|
|
| Et, que puellulis avara singulis solet partiri singula; huic sedula impendit copiosius et plenius forme munuscula. |
|
Nature studio longe venustata, contendit lilio rugis non crispata frons nivea. simplices siderea luce micant ocelli. |
|
|
| Omnes amantium trahit in se visus, spondens remedium verecunda risus lascivia. arcus supercilia discriminant gemelli. |
|
Ab utriusque luminis confinio moderati libraminis iudicio naris eminentia producitur venuste quadam temperantia: nec nimis erigitur nec premitur iniuste. |
|
|
| Allicit verbis dulcibus et osculis, castigate tumentibus labellulis, roseo nectareus odor infusus ori. pariter eburneus sedet ordo dentium par nivium candori. |
|
Certant nivi, micant lene pectus, mentum, colla, gene; sed, ne candore nimio evanescant in pallorem precastigat hunc candorem rosam mantans lilio prudentior Natura, ut ex his fiat aptior et gratior mixtura. |
|
|
| Rapit michi me Coronis, privilegiata donis et Gratiarum flosculis. nam Natura, dulcioris alimenta dans erroris, dum in stuporem populis hanc omnibus ostendit, in risu blando retia Veneria tetendit. |