Olim sudor Herculis Petrus Blesensis o Pietro di Blois (ca. 1135 - ca. 1204)       Olim sudor Herculis, monstra late conterens, pestes orbis auferens, claris longe titulis enituit; sed tandem defloruit fama prius celebris, cecis clausa tenebris, Ioles illecebris Alcide captivato.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.   Hydra damno capitum facta locupletior, omni peste sevior, reddere sollicitum non potuit, quem puella domuit. iugo cessit Veneris vir, qui maior superis celum tulit humeris Atlante fatigato.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.   Caco tristis halitus et flammarum vomitus vel fuga Nesso duplici non profuit: Geryon Hesperius ianitorque Stygius, uterque forma triplici non terruit, quem captivum tenuit risu puella simplici.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.   Iugo cessit tenero, somno qui letifero horti custodem divitis implicuit, frontis Acheloie cornu dedit Copie, apro, leone domitis enituit, Thraces equos imbuit cruenti cede hospitis.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.   Antei Libyci luctam sustinuit, casus sophistici fraudes cohibuit, cadere dum vetuit; sed qui sic explicuit lucte nodosos nexus, vincitur et vincitur, dum labitur magna Iovis soboles ad Ioles amplexus.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.   Tantis floruerat laborum titulis, quem blandis carcerat puella vinculis. et dum lambit osculis, nectar huic labellulis Venereum propinat; vir solutus otiis Venereis laborum memoriam et gloriam inclinat.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.   Sed Alcide fortior aggredior pugnam contra Venerem. ut superem hanc, fugio; in hoc enim prelio fugiendo fortius et melius pugnatur, sicque Venus vincitur: dum fugitur, fugatur.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.   Dulces nodos Veneris et carceris blandi seras resero, de cetero ad alia dum traducor studia. o Lycori, valeas et voveas, quod vovi: ab amore spiritum sollicitum removi.     Refrain: Amor fame meritum deflorat, amans tempus perditum non plorat, sed temere diffluere sub Venere laborat.

	Ritorna all'indice dei Carmina Burana
	Ritorna all'indice generale di A l'entrada del tens clar
	Ritorna alla Home
	Vai al sitemap java
	Visita il settore Narrativa

This page was created by Duca Lucifero, © 2001-2005 The gothiquesque set is an artwork made by Moyra.

Visitors: Accessi globali all'intero web dal 5 dicembre 1996

	Name: E-mail: Messaggio al Duca Lucifero