Archipoeta di Colonia: Archicancellarie, viris maior ceteris

Archipoeta di Colonia
(c. 1130 - c. 1167)
.VII.
Archicancellarie, viris maior ceteris

Archicancellarie,
viris maior ceteris,
splendore prudentie,
qua prudentes preteris,
iubar es ecclesie,
sicut sol est etheris.

3

6

Laudes tibi canimus,
cuius luce iubaris
illustratur animus
Friderici Cesaris,
quod libenter facimus,
cum sis dator hilaris.

9

12

Pollens bonis moribus
et nitore generis
in humanis artibus
et divinis litteris
cum sis maior omnibus,
nullo minor crederis.

15

18

Vir fortis et sapiens
Fortunam non sequeris,
in adversis patiens,
modestus in prosperis,
cuncta bene faciens
recta via graderis.

21

24

Ulixe facundior
Tulliane loqueris,
columba simplicior
nulli fraudes ingeris,
serpente callidior
a nullo deciperis.

27

30

Alexandro fortior
inimicos conteris,
David mansuetior
a cunctis diligeris,
Martinoque largior
das, quod iuste peteris.

33

36

In regni negotio
fit quodcumque precipis,
qui sine consilio
nichil prorsus incipis;
viget tanto socio
mens Romani principis.

39

42

Adhuc starent menia
Mediolanensium
nec Cesar per prelia
victor esset hostium,
nisi dei gratia
te dedisset socium.

45

48

Electum Colonie
claris dignum laudibus
pre multa pauperie
nudis laudo pedibus;
conqueror hoc hodie
coram sanctis omnibus.

51

54

Dum sanctorum omnium
colitur celebritas,
singuli colentium
gerunt vestes inclutas,
Archicancellarium
vatem pulset nuditas.

57

60

Poeta composuit
rationem rhytmicam,
at Irus imposuit
melodiam musicam,
unde bene meruit
mantellum et tunicam.

63

66

barra

barra

Ritorna all'indice dei
Carmina Burana

Ritorna all'indice generale di
A l'entrada del tens clar

Ritorna alla Home

Vai al sitemap java

Visita il settore Narrativa
barra