Ver prope florigerum
Ver prope florigerum, flava Licori, iam rosam aspicis, egressam tunicis, credere celo tepidiori tenera germina floris odori.
Iam iuxta garrulos lascivit rivulos flos dive Veneri gratus Adonis, herba recentibus apta coronis. Si declines iuxta fines fontis euntis vallibus declivibus, reddetur herba gracior, fons purior, mens lecior. O si tamen supra gramen gressus repressus morulam ad parvulam, inpresso celer basio Venereo, rem finio!
Cum flavi capitis develas verticem comamque colligis in nodum simplicem, ploratam Orpheo reddis Euridicem. Sed digitis evagatis circa locum voluptatis discursu libero, sub crure manum tenero dum perfero Medis et Persis impero!
Cum motu lateris sentitur Veneris illud et ultimum dulcescit operis, amice mediis relabor brachiis, dum respiraverim rebus Venereis. Te quando vultu video sidereo, depereo; sed quando rides lecior, illicior et levi causa capior illecebris amoris. Sed que placebas displices si iuvenem non abdices ad quem transfertur oculus tam sedulus, et nostri ridet emulus suspiria doloris.
Si lascivo more vivo,
fame nitorem detero; sed misero sic vivitur, cum debellatus animus ire sub hastam cogitur. Vale dicturus paginis, vale dicturus artibus, tibi, Licori, milito, tuis concedo partibus.
|